Flick-Barcelona; shumë harmoni, por pa kontakte rinovimi… për momentin

22 Dhjetor 2025

7:05

Alfred Lleshi

Marrëdhënia midis Hansi Flick dhe Barcelonës është jashtëzakonisht e mirë për të dyja palët, pothuajse idilike. Trajneri dhe klubi katalanas janë të lumtur që rrugët e tyre u takuan dhe planet janë që të vazhdojnë bashkë në të ardhmen e afërt. Megjithatë, pavarësisht dëshirës së fortë, për momentin nuk ka kontakte zyrtare për rinovimin e kontratës që përfundon në qershor 2027. Të gjithë mendojnë se ka kohë të mjaftueshme për t’u ulur dhe negociuar.

Flick zgjeroi marrëdhënien me klubin në maj dhe dëshira e tij është ta përmbushë kontratën. Ai shpesh thekson se është i lumtur në Barcelonë dhe se familja e tij ndihet mirë në “Ciudad Condal”. Barça, me Joan Laporta në krye, është shumë e kënaqur me punën dhe personalitetin e trajnerit, duke e konsideruar transferimin e tij një sukses të madh, jo vetëm për tre titujt e fituar (Superkupën, Kupën dhe La Liga-n), por edhe raportin e shkëlqyer me skuadrën dhe përkushtimin ndaj klubit.

Megjithatë, për momentin nuk ka kontakte të reja për ta zgjatur kontratën përtej 2027. Barça dhe trajneri, së bashku me agjentin e tij, mbajnë kontakte të vazhdueshme për të shprehur kënaqësinë nga bashkëpunimi. Flick dëshiron të fokusohet kryesisht te garat dhe synon t’i fitojë të gjitha kompeticionet ku Barça merr pjesë. Planifikohet që negociatat të zhvillohen disa muaj më vonë, para fundit të sezonit ose para zgjedhjeve presidenciale.

Trajneri nuk ka ngut për rinovimin, duke e ditur se pozicioni i tij varet nga rezultatet. Deco dhe Laporta janë të qetë, duke besuar se marrëveshja nuk do të ketë pengesa dhe se me Flick klubi ka një trajner kampion. Deri tani, në 85 ndeshjet me Barcelonën, Flick ka 63 fitore, 13 humbje dhe 9 barazime, me 241 gola të shënuar dhe 103 të pësuar.