“Nuk do të pranojmë t’i dorëzojmë territore Rusisë”/ Dyshohet për përfshirje në korrupsion, jep dorëheqjen shefi i kabinetit të Zelenskyt

Presidenti ukrainas, Volodymyr Zelensky, njoftoi se shefi i kabinetit të tij, Andriy Yermak, ka dhënë dorëheqjen pas një bastisjeje të agjencive antikorrupsion në apartamentin e tij në qendër të Kievit. Yermak, 54 vjeç, një nga figurat më të afërta me Zelensky-n që prej fillimit të luftës së plotë me Rusinë, është përballur me presion në rritje politik, megjithëse nuk është akuzuar për ndonjë shkelje.

Në një fjalim drejtuar kombit, Zelensky theksoi rëndësinë e unitetit kombëtar dhe paralajmëroi për rreziqet e polarizimit: “Ne rrezikojmë të humbasim gjithçka: veten, Ukrainën, të ardhmen tonë.” Ai falënderoi Yermakun për rolin e tij kyç në formësimin e qëndrimit të Ukrainës në negociatat ndërkombëtare, veçanërisht në një kohë kur Presidenti amerikan Donald Trump ka nisur një përpjekje të re diplomatike për t’i dhënë fund luftës me Rusinë.

Bastisja e kryer të premten në mëngjes në apartamentin e Yermak u shoqërua me deklaratën e tij publike se ai po bashkëpunonte plotësisht me autoritetet. Zelensky njoftoi se të shtunën do të fillojë konsultimet për emërimin e një drejtuesi të ri të zyrës presidenciale.

Largimi i Yermak konsiderohet një goditje e madhe për administratën ukrainase, teksa pritet që Sekretari i Ushtrisë Amerikane, Dan Driscoll, të mbërrijë në Kiev në kuadër të planit të paqes të iniciuar nga Trump. Në vijim, zyrtarë të lartë amerikanë do të zhvillojnë bisedime edhe në Moskë.

Vetëm pak orë para bastisjes, Yermak kishte theksuar se Ukraina nuk do të pranonte të dorëzonte territor ndaj Rusisë, pavarësisht presionit ndërkombëtar. Ai deklaroi për The Atlantic se Presidenti Zelensky “nuk do të nënshkruajë marrëveshje për territorin”.

Ndërkohë Rusia vazhdon të kërkojë që Ukraina të dorëzojë zona strategjike në rajonin e Donetskut, duke paralajmëruar me forcë ushtarake nëse nuk arrihet një zgjidhje diplomatike.

Yermak e pranoi se ishte nën “presion të madh” për t’u larguar dhe kërkoi një hetim të pavarur, pa ndikime politike, për çështjen që ka ngjallur debat publik në Kiev.

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb