Brukseli thirrje Kievit: Dënoni zyrtarë e korruptuar nëse doni të anëtarësoheni në BE

Një zyrtar i lartë i BE-së paralajmëroi se Kievi duhet të ndjekë penalisht politikanët dhe biznesmenët e korruptuar nëse dëshiron të anëtarësohet në Bashkimin Evropian, teksa shtohet presioni mbi presidentin e Ukrainës, Volodymyr Zelenski, për shkak të akuzave në rritje për korrupsion.

Në një intervistë për Politico, Komisioneri Evropian për Drejtësinë, Michael McGrath, tha se qeveritë evropiane nuk do të mbështesin anëtarësimin e një vendi kandidat si Ukraina në BE-në 27-anëtarëshe, nëse nuk vërtetohet se ky vend ka një sistem efektiv për të luftuar krimin në nivelet më të larta të shoqërisë.

Edhe pse procesi i reformave në Ukrainë është “një udhëtim”, McGrath tha se beson se Kievi po bën “çdo përpjekje të mundshme” për të luftuar korrupsionin dhe se BE-ja është në kontakt të rregullt me autoritetet ukrainase për zhvillimet e fundit.

Duke iu përgjigjur pyetjeve për një supozuar skemë për përvetësimin e rreth 100 milionë dollarëve nga sektori energjetik i Ukrainës, që tani përfshin edhe zyrtarë të lartë të qeverisë dhe të Zelenskyt, McGrath tha:

“Çdo vend kandidat duhet të ketë një sistem të fortë për trajtimin e rasteve të korrupsionit në nivele të larta. Duhet të ketë një mekanizëm të fuqishëm për hetimin, ndjekjen penale dhe dënimin, dhe provimi i efektivitetit në këtë fushë është një kërkesë që ne e bëjmë për të gjitha shtetet anëtare dhe sigurisht për vendet që duan të hyjnë në BE.”

Pas këtyre deklaratave, hetuesit kundër korrupsionit realizuan një bastisje në zyrat e këshilltarit më të fuqishëm të Zelenskyt, Andriy Yermak, si pjesë e hetimeve të tyre të vazhdueshme.

Kjo ndodh në një moment shumë të ndjeshëm për Ukrainën, ndërsa presidenti amerikan Donald Trump po ushtron presion mbi Zelenskyn për të pranuar një marrëveshje paqeje që mund ta detyrojë të japë territore ndaj Rusisë.

Ukraina ndodhet në procesin e paraqitjes së kërkesës për anëtarësim në BE, megjithëse kundërshtimi i Hungarisë ka penguar përparimin. McGrath theksoi se “të njëjtat standarde vlejnë për të gjitha vendet kandidat”, duke shtuar se “reformat në fushën e sundimit të ligjit dhe drejtësisë janë në qendër të procesit të aderimit”.

“Ne kemi një marrëdhënie shumë të hapur dhe të sinqertë me autoritetet ukrainase lidhur me këto kërkesa,” tha ai. “Këto standarde të sundimit të ligjit duhet të plotësohen nga të gjitha vendet që hyjnë në BE. Nëse nuk zbatohen, nuk do të keni mbështetjen e shteteve anëtare për të vazhduar rrugën drejt anëtarësimit.”

Pyetur nëse Ukraina po bën mjaftueshëm, McGrath u përgjigj: Mendoj se po bëjnë çdo përpjekje për të arritur standardin e kërkuar. Është një proces, ne monitorojmë nga afër zhvillimet dhe mbajmë kontakt të vazhdueshëm me autoritetet ukrainase për çdo çështje që bie në vëmendjen tonë ose publikohet.

© BalkanWeb

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb