Barcelona, fitore pa shkëlqim/ Skuadra “blaugrana” mundi 3-1 Alvates dhe merr kreun në La Liga

Barcelona fiton dhe merr kreun e renditjes në La Liga, por jo të gjithë janë të lumtur te skuadra “blaugrana”. Kjo video e trajnerit Hansi Flick, I dëshpëruar dhe thuajse në lot tregon qartë se paraqitja e katalunjasve në suksesin me përmbysje 3-1 kundër Alavesh nuk ishte aspak ekzaltues.

Në ndeshjen e dytë për këtë sezon në stadiumin e ri “Camp Nou”, Barcelona mori menjëherë një goditje të rendë. Që në minutën e parë, miqtë kaluan në epërsi me Ibanez. Përgjigja e të zotëve të shtëpisë ishte e shpejtë.

Në minutën e tetë, Lamin Yamal barazoi shifrat, ndërsa në të 26-ën, Dani Olmo shënoi edhe golin e dytë për të kthyer festën te populli “blaugrana”. Por nga ky moment, për çudi të të gjithëve, vendasit do të ulnin ritmin dhe do të shfaqnin një tjetër “fytyrë” në lojën e tyre.

Nuk sollën asgjë minutat e mbetura të pjesës së parë, ndërsa as pushimi i ndeshjes nuk bëri efekt. Në fraksionin e dytë, Alavesh rrezikoi jo pak të dilte me pikë nga kjo sfidë, ndërsa vetëm në shtesë, Dani Olmo me golin e dytë personal dhe të tretin për Barcelonën vulosi fatin e ndeshjes. Me këtë fitore, Barcelona parakalon Real Madrid në krye të renditjes me dy pikë më shumë. Tani presioni është te madrilenët, që në mbrëmje do të luajnë sfidën e tyre për javën e 14 të La Liga.

Të ngjashme