Bilanci tragjik në Hong Kong/ Zjarri vdekjeprurës i dekadës la 159 viktima, mes tyre një foshnjë

Numri i viktimave nga zjarri më i rëndë që ka goditur Hong Kongun në dekada u rrit në 159, njoftuan autoritetet, duke konfirmuar se mes të vdekurve janë një foshnje dhe një 97-vjeçar. Ekipet e shpëtimit vazhdojnë kërkimet në kompleksin e shkatërruar nga flakët, ndërsa gjetjet e reja përfshijnë trupa në çati, shkallë dhe mbetje të reduktuara në hi.

Banorët e vetmit bllok të kompleksit që nuk u përfshi nga zjarri u lejuan përkohësisht të kthehen për të marrë sendet personale.

Nga 159 trupat e gjetur, 140 janë identifikuar: 91 gra dhe 49 burra, të moshave nga 1 deri në 97 vjeç. Ende 31 persona rezultojnë të zhdukur, përfshirë punonjese të huaja nga Indonezia dhe Filipinet.

Policia ka arrestuar 21 persona të dyshuar për vrasje nga neglizhenca, ndërsa organi kundër korrupsionit i Hong Kongut po heton mundësinë e aferave korruptive të lidhura me punimet në godinë.

Kryeadministratori i qytetit, John Lee, ka urdhëruar krijimin e një komiteti të drejtuar nga një gjyqtar për të hetuar shkaqet e tragjedisë dhe për të rishikuar mbikëqyrjen e rinovimeve të ndërtesave, të cilat dyshohet se përshkallëzuan flakët.

Banorët e Wang Fuk Court kishin raportuar më herët shqetësime mbi rreziqet nga zjarri, por vitin e kaluar autoritetet u informuan se blloku përbënte “rrezik relativisht të ulët”, sipas Departamentit të Punës së Hong Kongut.

Hetimet paraprake tregojnë se rrjeta plastike nën standard dhe materiale izoluese prej shkumë plastike, të përdorura gjatë rinovimit të godinës, kanë luajtur rol kyç në përhapjen e shpejtë të zjarrit në ndërtesën e lartë. 

Të ngjashme