Dështon misioni “Baikonur”, Rusia rrezikon që të mos dërgojë astronautë në hapësirë

Një platformë lëshimi në kozmodromin rus Baikonur pësoi dëmtime gjatë nisjes së misionit që dërgoi dy rusë dhe një amerikan në Stacionin Ndërkombëtar të Hapësirës të enjten, njoftoi agjencia hapësinore e Moskës.

Anija kozmike Soyuz MS-28 u ankorua me sukses në stacion, dhe tre anëtarët e ekuipazhit u futën në bord, tha Roscosmos.

Megjithatë, një inspektim pas nisjes në Baikonur, në Kazakistan, zbuloi “dëmtime në disa pjesë të platformës së lëshimit”, sipas një deklarate të Roscosmos të cituar nga CNN.

“Së fundmi po vlerësohet gjendja e kompleksit hapësinor,” tha agjencia, duke shtuar se të gjitha pjesët e nevojshme për riparimin e platformës janë të disponueshme.
“Dëmet do të riparohen në një të ardhme të afërt”, u theksua.

Platforma e lëshimit përfshin sistemet mbështetëse të raketës dhe strukturat që u mundësojnë kozmonautëve të hyjnë në kapsulë, e cila ndodhet në majë të raketës Soyuz.
Këto platforma duhet të përballojnë temperatura ekstreme, presion të madh ajri dhe dridhje të forta gjatë ngritjes së raketës.

Analistë rusë thanë se riparimet mund të zgjasin një javë ose më shumë, dhe se çdo vonesë e madhe mund të pengojë aftësinë e Rusisë për të nisur misione drejt stacionit.

“Në rastin më të keq, kjo mund të ndikojë seriozisht në rotacionin e misioneve të ekuipazhit dhe në dërgimin e ngarkesave drejt ISS,” shkroi analisti dhe blogeri Georgiy Triskin në Telegram.

Normalisht, ekuipazhet për ISS nisen nga Baikonur çdo gjashtë muaj.

“Kjo është e vetmja platformë që përdor Roscosmos për programin e ISS, dhe në të ardhmen ishte planifikuar të shërbente edhe për nisjet drejt stacionit të ri orbital rus,” shkroi komentatori Vitaly Egorov në Telegram. Përveç raketës ruse Soyuz, NASA përdor anijen Dragon të SpaceX për të transportuar astronautët në ISS.

© BalkanWeb

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb