Goditje tjetër për Sarkozy-n, Gjykata e Lartë konfirmon dënimin për financim të paligjshëm të fushatës në 2012

Gjykata e Lartë e Francës vendosi ditën e sotme dënimin përfundimtar të Nicolas Sarkozy në çështjen Bygmalion, që lidhet me financimin e paligjshëm të fushatës së tij elektorale në 2012. Ky është dënimi i dytë penal për ish-presidentin, pas çështjes së “dëgjimeve të paligjshme”.

Në këtë çështje, Sarkozy ishte dënuar më 14 shkurt 2024 nga Apeli i Parisit me një vit burg, nga i cili gjashtë muaj pa kushte pezullimi.

Sipas Le Monde, gjykata kishte urdhëruar që dënimi të kryhej me mënyra alternative, si arrest shtëpiak me shirit elektronik ose lirim i pjesshëm.

Hetimet zbuluan se, për të fshehur rritjen e shpenzimeve të fushatës, rreth 43 milionë euro, thuajse dyfishin e kufirit të lejuar prej 22,5 milionë eurosh, ishte krijuar një sistem faturash të dyfishta.

Përmes kontratave fiktive, pjesa më e madhe e shpenzimeve të tubimeve elektorale transferohej tek partia UMP (sot Republikanët).

Sarkozy nuk akuzohej për pjesëmarrje në këtë sistem faturash të falsifikuara, por si përfitues i financimit të paligjshëm. Ish-presidenti mohoi “me vendosmëri çdo përgjegjësi penale”, duke e quajtur çështjen “tregime” dhe “gënjeshtra”. Dënimi i tij në Apel ishte pak më i ulët se ai fillestar në 2021, kur ishte dënuar me një vit burg pa pezullim.

Tre të tjerë të dënuar në këtë çështje, drejtori i fushatës Guillaume Lambert dhe dy ish-zyrtarë të UMP-së, Eric Cesari dhe Pierre Sassard, gjithashtu apeluan në Gjykatën e Lartë.

Ky vendim vjen vetëm dy javë pas lirimit të tij nga burgu La Sante, ku kishte qëndruar 20 ditë për një çështje tjetër, që lidhet me financimin e dyshuar të fushatës së tij në 2007 me para nga Libia e Muamar Kadafit. Procesi i Apelit për këtë çështje është caktuar për periudhën 16 mars – 3 qershor 2026.

Gjithashtu, Sarkozy dhe bashkëshortja e tij, Carla Bruni-Sarkozy, përballen me hetime të tjera gjyqësore për përpjekje të mundshme për të ndikuar dëshmitarët në të njëjtën çështje.
Vendimi i sotëm përbën një goditje tjetër për 70-vjeçarin Sarkozy, i cili vitet e fundit ka qenë në qendër të një serie procedurash gjyqësore.
Në 2023, e njëjta gjykatë kishte konfirmuar dënimin e tij të mëparshëm për korrupsion dhe ushtrim ndikimi, çështje që u zbulua përmes përgjimeve telefonike.
Ish-presidenti, i cili do të publikojë më 10 dhjetor librin e tij “Ditari i një të Burgosuri”, ka thënë se “përvoja në burg ishte një makth”.

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb