Greva pezullohet, Muzeu i Luvrit rihapet plotësisht

Muzeu i Luvrit në Paris u rihap plotësisht të premten e 19 dhjetorit, pasi stafi votoi për të pezulluar grevën që kishte ndërprerë aksesin në muzeun më të vizituar në botë.

Associated Press shkruan se vendimi u mor gjatë një asambleje të përgjithshme të punonjësve të muzeut, të cilët votuan unanimisht për të ndalur përkohësisht grevën në mënyrë që muzeu të mund të mirëpriste vizitorët, thanë sindikatat në një deklaratë. Greva kishte çuar në mbyllje të plotë më herët gjatë javës dhe në një rihapje të pjesshme të mërkurën.

Sindikatat thanë se pezullimi pasoi pesë takime me zyrtarë të Ministrisë së Kulturës, por theksuan se përparimi mbetet i pamjaftueshëm, veçanërisht në nivelet e stafit, pagat dhe planet afatgjata të sigurisë. Ata gjithashtu përmendën shqetësime mbi degradimin e ndërtesës dhe kushtet e punës.

Përfaqësuesit e sindikatave kritikuan atë që e përshkruan si mungesë angazhimi nga presidentja e Luvrit, Laurence des Cars, gjatë grevës, duke thënë se ajo as nuk u takua me stafin dhe as nuk iu drejtua atyre gjatë mobilizimit.

Punonjësit pritet të mbajnë një tjetër asamble të përgjithshme më 5 janar për të vendosur nëse do të rifillojnë grevën.

Të ngjashme