“I rruajti lekët”, Valentino Rosi çon në gjykatë të dashurën e babait

Përplasja mes Valentino Rosit dhe babait të tij Graciano përfundon në gjykatë. Gjithçka nis në vitin 2024, kur ikona e motoçiklizmit kërkon dhe merr emërimin si administrator mbështetës i të atit, sot 71 vjeç, të cilin e konsideron psikologjikisht të brishtë. Pas një viti, Graciano i kërkon të birit të lirohet nga ky kontroll ligjor. Valentino nuk pranon dhe nis një proces civil.

Më 4 mars 2025, gjykata e Pesaros i jep të drejtë babait, duke e konsideruar plotësisht të aftë për të kuptuar dhe vepruar. Në këtë pikë, Valentino vendos të mos apelojë vendimin, por kalon në një tjetër front: paraqet kallëzim penal ndaj partneres aktuale të të atit, duke e akuzuar për shfrytëzim të personit të paaftë. Sipas rindërtimit të tij, ajo ka tërhequr nga llogaria e Graciano Rosit 176 mijë euro, prej të cilave 100 mijë me përshkrimin “hua”, si dhe 34 mijë euro të tjera në “cash” gjatë 12 viteve të lidhjes.

Zbulimi, sipas Valentinos, ka ndodhur gjatë vitit kur ai ushtronte rolin e administratorit mbështetës. Zëvendësprokurorja Irene Lilliu ka urdhëruar një sërë ekzaminimesh psikiatrike për Graciano Rosin, të cilat kanë konfirmuar se ai nuk ka nevojë për administrator mbështetës dhe se nuk mund të konsiderohet i mashtruar apo i paaftë. Tashmë, ndërsa “Guardia di Finanza” po heton të gjitha daljet financiare nga llogaritë e Graciano Rosit, prokuroria duhet të vendosë nëse do të kërkojë arkivimin e çështjes ndaj partneres së tij apo dërgimin e saj në gjyq.

© BalkanWeb