Kaliforni, tragedi në Stockton, 4 viktima dhe 14 të plagosur pas të shtënave në festën e ditëlindjes

Katër persona humbën jetën dhe 14 të tjerë u plagosën në një sulm me armë zjarri gjatë një feste ditëlindjeje në Stockton, Kalifornia, të shtunën në mbrëmje, njoftoi policia lokale.

Të shtënat ndodhën gjatë një aktiviteti familjar në një nga lagjet e Stockton-it, në Kaliforninë veriore. Nënkryetari i bashkisë së qytetit, Jason Lee, konfirmoi ngjarjen dhe tha në një postim në Facebook se po qëndron në kontakt me stafin dhe zyrtarët e sigurisë për të zbardhur rrethanat e incidentit.

“Jam në kontakt me stafin dhe autoritetet për të kuptuar saktësisht se çfarë ka ndodhur dhe do të kërkoj përgjigje”, shkroi Lee në postimin e tij.

Policia e Stockton-it raportoi se mori njoftimin për të shtënat pak para orës 18:00 sipas kohës lokale (02:00 GMT). Incidenti ka ndodhur në afërsi të bllokut 1900 të Lucile Avenue, një zonë që shpesh frekuentohet nga familjarë dhe banorë të qytetit.

Një hetim i plotë është duke u zhvilluar, ndërsa autoritetet kërkojnë informacion për identifikimin e autorëve të krimit. Ndërkohë, qytetarët janë ftuar të bashkëpunojnë me policinë për ndihmën në zbardhjen e ngjarjes.

© BalkanWeb

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb