Konflikti nisi në rrjetet sociale/ Durrës, 15-vjeçari u godit katër herë më thikë nga bashkëmoshatari

DURRËS- Policia e Durrësit konfirmoi për ABC News se 15-vjeçari u qëllua nga bashkëmoshatari i tij katër herë me thikë. Mësohet se shkak është bërë një koment në rrjetet sociale, çka ka bërë që adoleshentët të lënë takim sqarimi.

Të dyja palët në takim, që më pas u kthye në një arenë sherri, ishin të shoqëruar me nga tre-katër shokë secili.

Fillimisht ata kanë debatuar dhe shkëmbyer fyerje mes njëri-tjetrit, ndërsa më pas situata u ndez dhe në sherr u përfshinë mbi 6 persona, ku u përdorën mjete të forta dhe armë të ftohta.

Ku në një moment, 14-vjeçari nxjerr thikën dhe qëllon mbi 15-vjeçarin katër herë me thikë duke e lënë të plagosur rëndë. 15-vjeçari u transportua drejt urgjencës së spitalit të Durrësit ku iu nënshtrua një ndërhyrjeje kirurgjikale.

Burime nga spitali i Durrësit thonë se 15-vjeçari për momentin është në gjendje shëndetësore të stabilizuar dhe jashtë rrezikut për jetën.