Nga çështja e Iranit te Tajvani dhe tregtia, Trump telefonatë me Xi Jinping: Marrëdhënia me Kinën, jashtëzakonisht e mirë
Presidenti amerikan Donald Trump tha sot se ai dhe Presidenti kinez Xi Jinping diskutuan situatën në Iran në një telefonatë që vjen në një kohë kur administrata amerikane po i shtyn Pekinin dhe të tjerët të izolojnë Teheranin.
Trump tha se të dy udhëheqësit diskutuan gjithashtu një gamë të gjerë çështjesh të tjera kritike në marrëdhëniet SHBA-Kinë , duke përfshirë tregtinë dhe Tajvanin, si dhe planet e tij për të vizituar Pekinin në prill.
“Marrëdhënia me Kinën dhe marrëdhënia ime personale me Presidentin Xi është jashtëzakonisht e mirë dhe të dy e kuptojmë sa e rëndësishme është ta mbajmë kështu”, tha Trump në një postim në rrjetet sociale në lidhje me telefonatën.
Qeveria kineze, në një deklaratë të shkurtër të bisedës telefonike, tha se të dy udhëheqësit diskutuan për samitet e mëdha që të dy vendet do të organizojnë vitin e ardhshëm dhe paraqesin mundësi që të dy udhëheqësit të takohen potencialisht. Megjithatë, deklarata kineze nuk përmendi vizitën e pritur të Trump në Pekin në prill.
Kina gjithashtu e bëri të qartë se nuk ka ndërmend të tërhiqet nga planet e saj afatgjata të ribashkimit me Tajvanin, një ishull vetëqeverisës dhe demokratik që vepron në mënyrë të pavarur nga Kina kontinentale, megjithëse Pekini e pretendon atë si territorin e vet.
“Kina nuk do të lejojë kurrë që Tajvani të ndahet”, thuhet në deklaratën kineze.
Trump, i cili vazhdon të shqyrtojë mundësinë e ndërmarrjes së veprimeve ushtarake kundër Iranit, njoftoi muajin e kaluar në një postim në rrjetet sociale se do të vendoste një taksë prej 25% mbi importet në Shtetet e Bashkuara nga vendet që bëjnë biznes me Iranin.
Vite të tëra sanksionesh që synojnë ndalimin e programit bërthamor të Iranit e kanë lënë vendin të izoluar. Por Teherani arriti të realizonte gati 125 miliardë dollarë tregti ndërkombëtare në vitin 2024, duke përfshirë 32 miliardë dollarë me Kinën, 28 miliardë dollarë me Emiratet e Bashkuara Arabe dhe 17 miliardë dollarë me Turqinë, sipas Organizatës Botërore të Tregtisë.
Xi foli të mërkurën edhe me Presidentin rus Vladimir Putin.
Angazhimi i Xi me Trump dhe Putin vjen në një kohë kur pakti i fundit i mbetur për armët bërthamore , i njohur si traktati i Ri START, midis Rusisë dhe Shteteve të Bashkuara pritet të skadojë të enjten, duke hequr çdo kufizim në dy arsenalet më të mëdha atomike për herë të parë në më shumë se gjysmë shekulli.
© BalkanWeb
