Pas urdhrit të AKU-së, firma tërheq nga tregu të gjitha seritë e qumështit Aptamil, për foshnje. Rezultoi me toksina të rrezikshme për shëndetin

Ushqimi për foshnja “Aptamil AR2”, është hequr nga tregu, pas një vendimi të marrë nga Agjencia e Kontrollit të Ushqimit.

Kjo pasi në një seri të këtij produkti, është identifikuar prania e substancës Cereulide.

“Duke qenë se niveli i rrezikut është vlerësuar serioz, firma ka ndërmarrë masa të menjëhershme për tërheqjen nga tregu të produktit, APTAMIL AR 2 – formulë ushqimore për foshnje, paketimi, ENG 24 x 400 gr. Prodhuar nga Nutricia Infant Nutrition Ireland Ltd. (Danone”, ka njoftuar AKU.

Në një njoftim, biznesi distributor i shpërndarjes së produktit në treg, njofton qytetarët që kanë blerë qumësht Aptamil,  të mos e përdorin atë dhe ta kthejnë në pikat e shitjes duke u rimbursuar.

Autoriteti Kombëtar i Ushqimit njoftoi më 22 janar se bëhet fjalë për produktin NAN 1 OPTIPRO, për të cilin është identifikuar prania e një bakteri potencialisht të dëmshëm.

Pas sinjalizimit të marrë përmes sistemit europian të alarmit për ushqimet, AKU ka kryer verifikimet përkatëse dhe ka bllokuar të gjithë sasinë e produktit që ndodhej në qarkullim në vend. Produkti është tërhequr nga pikat e shitjes dhe është vendosur që të asgjësohet ose të kthehet në vendin e origjinës.

Autoriteti u bëri thirrje prindërve që e kanë blerë këtë qumësht formulë të mos e përdorin dhe ta dorëzojnë në dyqanin ku e kanë blerë, si masë parandaluese për mbrojtjen e shëndetit të foshnjave.

Sipas njoftimit zyrtar, veprimet janë ndërmarrë në bashkëpunim me strukturat përkatëse dhe kanë për qëllim garantimin e sigurisë ushqimore dhe shmangien e çdo rreziku për konsumatorët më të vegjël.

© BalkanWeb