Presidenti serb: Rafineria NIS, nga e marta nuk do të funksionojë më

Presidenti i Serbisë, Aleksandar Vuçiç, ka njoftuar se nga e marta rafineria e Industrisë së Naftës së Serbisë (NIS) në Pançevë nuk do të funksionojë më. Vuçiç shtoi se Serbisë do t’i duhet të gjejë “mënyra për të menaxhuar situatën”.

Gjithashtu presidenti serb deklaroi se do të përpiqet të zhvillojë bisedime shtesë me përfaqësues amerikanë, por u shpreh pesimist se do të ndërrojë diçka në këtë drejtim dhe si rrjedhojë rafineria duhet të mbyllet të martën, raportojnë mediat serbe.

Presidenti serb paraprakisht tha për një televizion serb se “nuk e kupton logjikën dhe taktikën” e SHBA-së se pse kësaj kompanie nuk po i zgjatet leja punës, pavarësisht se shteti serb ka dhënë garanci se deri në afatin e vendosur nga SHBA-ja do të ndryshohet pronësia në atë kompani, e cila është nën sanksionet amerikane për shkak të pronësisë ruse.

“Nuk mund ta kuptoj çfarë është ajo që amerikanët po bëjnë tani, po ua them hapur, nuk e kuptoj logjikën e tyre”, deklaroi ai.

Vuçiç tha se i kanë bërë me dije SHBA-së se i respektojnë sanksionet e tyre dhe se është e nevojshme që të ndryshohet pronësia e NIS-it, por se kjo do të ndodhë brenda 50 ditësh, për çka tha se i ka dhënë garanci, por ai ka cituar SHBA-në që këto sanksione i kanë paralajmëruar që para tetë apo nëntë muajsh.

Presidenti serb përsëriti se Serbia nuk është pronarja kryesore e kompanisë dhe se ajo nuk mund të vendosë në emër të rusëve se çfarë do të bëjë me të.

© BalkanWeb

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb