Të shtënat me armë në Brown University, policia në kërkim të autorit

Autoritetet në Rhode Island ende nuk kanë kapur personin që shkoi në një auditor të Brown University dhe hapi zjarr, duke vrarë të paktën dy studentë dhe plagosur nëntë të tjerë.

Një person që ishte ndaluar më parë është liruar, pasi nuk u gjet asnjë bazë për ta konsideruar të përfshirë në ngjarje. Incidenti ndodhi të shtunën pasdite, kur autori përdori një armë zjarri brenda auditoreve. Një nga studentët e plagosur ndodhet në gjendje kritike në spital.

Zyrtarët e universitetit paralajmërojnë studentët të jenë vigjilentë dhe të kujdesen për sigurinë e tyre në kampus. Ata gjithashtu thanë se po bashkëpunojnë plotësisht me Departamentin e Policisë së Providences.

Prokurori i Përgjithshëm Peter Neronha shprehu besimin se hetimet do të sjellin zgjidhje, duke theksuar se ka një vrasës të lirë që duhet gjetur. Ai shtoi se nuk ka shumë kamera në ndërtesën ku ndodhi sulmi, por nuk po përjashtojnë asnjë material që mund të jetë i dobishëm për hetimin, raporton The New York Times.

Kryetari i qytetit, Brett Smiley, tha se nuk ka nevojë që banorët të qëndrojnë në shtëpi, por do të ketë prani të shtuar të policisë në Providence dhe kampusin e Brown. Videoja e publikuar nga autoritetet tregon një person të veshur me rroba të errëta, që largohet nga vendi i ngjarjes.

Hetuesit po kërkojnë gjithashtu pamje shtesë nga zonat përreth për të gjetur prova të reja. Kreu i policisë së Providences, Col. Oscar Perez, tha se do të takohet me zyrtarë federalë për të vazhduar hetimet. Zyrtarët thonë se personi në video ende duhet konsideruar si i dyshuar.

Policia dhe universiteti vazhdojnë të punojnë për sigurinë e vendngjarjes dhe për informacione të mëtejshme. Hetimi mbetet aktiv, ndërsa autoritetet shprehin optimizëm, se rastin do ta zgjidhin së shpejti.

Të ngjashme