Trump dërgon emisarin tek Putini, marrëveshja e paqes ka pësuar disa ndryshime
Presidenti amerikan, Donald Trump ka deklaruar se ekipi i tij ka bërë “progres të jashtëzakonshëm” gjatë javës së fundit për përfundimin e luftës mes Rusisë dhe Ukrainës, një konflikt që, sipas tij, “nuk do të kishte filluar kurrë nëse unë do të isha president!”.
Lideri amerikan thekson në rrjetet sociale se gjatë muajit të fundit kanë humbur jetën 25 mijë ushtarë.
Plani fillestar amerikan për paqe me 28 pika është rishikuar dhe përmirësuar me kontribut nga të dyja palët, duke lënë vetëm disa mosmarrëveshjeje të vogla.
Për të finalizuar këtë plan, ai ka udhëzuar përfaqësuesin e posaçëm amerikan, Steve Witkoff, të takohet me presidentin rus, Vladimir Putin në Moskë, ndërsa Sekretari i Ushtrisë, Dan Driscoll, do të takohet me përfaqësuesit ukrainas.
Trump do të informohet për të gjitha zhvillimet së bashku me zëvendëspresidentin amerikan, JD Vance, Sekretarin e Shtetit, Marco Rubio, Sekretarin e Luftës, Pete Hegseth dhe Shefen e Stafit të Shtëpisë së Bardhë, Susie Wiles. Ai shprehet se mezi pret të takohet me presidentin ukrainas, Volodymyr Zelensky dhe homologun rus, por vetëm kur marrëveshja për të përfunduar luftën të jetë në fazën finale.
Ai i bëri thirrje publikut që të shpresojë për arritjen e paqes “sa më shpejt të jetë e mundur”. Ndryshe, Zelensky parimisht ka pranuar planin e paqes të propozuar nga Trump.
