VIDEO/ Një anije cisterne sulmohet pranë brigjeve të Turqisë. Dyshohet si i përket…
Një cisternë nafte që lundronte pranë bregdetit turk në Detin e Zi u sulmua, nga një mjet pa pilot që lëviz në sipërfaqe, vetëm një ditë pasi kishte qenë objektivi i një sulmi të ngjashëm, njoftoi Ministria turke e Transportit.
“Sipas informacioneve tona, anija Virat, e cila u godit nga mjete detare pa ekuipazh rreth 35 milje detare larg bregut të Detit të Zi, u sulmua sërish sot në mëngjes”, thuhet në njoftimin e ministrisë.
Anija, e cila mban flamurin e Gambias dhe dyshohet se i përket të ashtuquajturit “flotë hije” ruse, pësoi “dëme të lehta në anën e djathtë, mbi vijën e ujit”, sqaroi ministria.
Ajo shtoi se “nuk ka shpërthyer zjarr” dhe se “i gjithë ekuipazhi është në gjendje të mirë shëndetësore”.
Ekipet e shpëtimit po mbajnë distancë sigurie, pasi anija nuk ka lëshuar sinjal rreziku.
Ndërkohë, në një cisternë të dytë me flamur të Gambias, që ishte duke udhëtuar drejt Rusisë, shpërtheu zjarr mbrëmjen e të premtes pas një eksplozioni, rreth 28 milje detare nga bregu turk.
Sipas ministrit turk të Transportit, Abdulkadir Uraloglu, 25 anëtarët e ekuipazhit të anijes Kairos u evakuuan dhe janë të gjithë mirë.
Të dy cisternat janë nën sanksione perëndimore, pasi transportonin naftë nga porte ruse pavarësisht embargos së vendosur pas pushtimit rus të Ukrainës në shkurt 2022.
Drejtoria e Çështjeve Detare të Turqisë publikoi mbrëmë pamje ku shihet Kairos i përfshirë nga flakët dhe nga anija ngrihej tym i dendur i zi.
Sipas autoriteteve, rezervuarët e saj ishin bosh, përveç karburantit të vet, dhe anija ishte nisur drejt portit rus të Novorossiysk, në verilindje të Detit të Zi, pranë hyrjes së Detit Azov.
Në të njëjtën zonë, terminali i rëndësishëm i naftës pranë Novorossiysk ndaloi operacionet sot herët në mëngjes, pasi një mjet detar pa pilot dëmtoi një nga tre vendstrehimet e ankorimit. Kompania që e menaxhon e cilësoi incidentin si “sulm të qëllimshëm terrorist”. Turqia njoftoi se deri tani nuk ka vënë re ndotje rreth anijes Kairos.
Një ekip specialistësh mjedisorë dhe zhytës do të dërgohet në vendngjarje sapo të shuhen flakët. Sipas platformës VesselFinder, Kairos është ndërtuar në vitin 2002, ndërsa Virat në vitin 2018. Të dyja anijet janë nën sanksione nga Bashkimi Evropian dhe Commonëealth-i, ndërsa Virat figuron gjithashtu në listën e sanksioneve të SHBA-së.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb
