Votuesit zviceranë refuzojnë taksën e propozuar për të pasurit

Votuesit në Zvicër kanë refuzuar me një shumicë të thellë propozimin për vendosjen e një takse 50% mbi pasuritë e trashëguara me vlerë 50 milionë franga zvicerane (rreth 62 milionë dollarë) ose më shumë. Sipas rezultateve zyrtare, 78% e votuesve u shprehën kundër masës, një nivel kundërshtimi që tejkaloi madje edhe parashikimet e sondazheve, të cilat sugjeronin rreth dy të tretat kundër.

Procesi u ndoq me vëmendje nga sektori bankar, i cili e konsideroi votimin si një tregues të oreksit për rishpërndarje të pasurisë në Zvicër, në një kohë kur vende të tjera europiane – përfshirë Norvegjinë – kanë rritur ose debatojnë për rritje të taksave mbi pasurinë.

Zvicra, një nga vendet me qytetet më të shtrenjta në botë, po përballet me rritje të ndjeshme të kostos së jetesës, çka ka shtuar presionin për reforma ekonomike dhe sociale në politikat vendore.

Nisma u propozua nga krahu i të rinjve të Partisë Socialdemokrate (JUSO), e cila argumentonte se super të pasurit trashëgojnë miliarda, ndërsa gjeneratat e reja trashëgojnë krizë klimatike. Të ardhurat e mbledhura nga taksa synoheshin të kanalizoheshin në projekte për të reduktuar ndikimet e ndryshimeve klimatike.

Kritikët e nismës paralajmëruan se një taksë kaq e lartë do të nxiste largimin e individëve ultra të pasur nga Zvicra, duke reduktuar të ardhurat totale nga tatimet dhe duke dëmtuar konkurrueshmërinë ekonomike të vendit. Edhe vetë qeveria zvicerane u bëri thirrje qytetarëve të votonin kundër propozimit.  / abcnews.al /

Të ngjashme