Zelensky biseda urgjente me liderët evropianë për planin 28-pikësh të Trump, mospajtime për ushtrinë dhe territoret

Presidenti ukrainas Volodymyr Zelensky zhvilloi një bisedë telefonike urgjente me udhëheqësit kryesorë evropianë të premten pasdite, pas publikimit të planit 28-pikësh të Donald Trump për t’i dhënë fund luftës në Ukrainë. Sipas burimeve diplomatike, mes aleatëve ka mospërputhje të dukshme për disa pika kyçe të propozimit amerikan, përfshirë praninë e ushtrisë ukrainase dhe çështjet territoriale.

Biseda mes liderëve evropianë: Mbështetje për Ukrainën, por shqetësim për planin
Qeveria gjermane njoftoi se kancelari Friedrich Merz ka diskutuar situatën me presidentin francez Emmanuel Macron, kryeministrin britanik Keir Starmer dhe presidentin ukrainas Zelensky. Të katër drejtuesit “u zotuan për mbështetje të vazhdueshme dhe të plotë për Ukrainën në rrugën drejt një paqeje të qëndrueshme dhe të drejtë”.
Ata mirëpritën përpjekjet amerikane për t’i dhënë fund luftës, por theksuan se çdo proces paqeje duhet të respektojë sovranitetin territorial të Ukrainës dhe të përfshijë garanci të forta sigurie për Kievin.
Sipas deklaratës së Berlinit, udhëheqësit ranë dakord se mbrojtja e interesave afatgjata evropiane dhe ukrainase mbetet thelbësore. “Vija e kontaktit duhet të jetë pikënisja e negociatave,” thuhet në komunikatë, ndërsa theksohet se ushtria ukrainase “duhet të ruajë aftësinë për të mbrojtur sovranitetin e vendit”.

Çfarë përmban plani i SHBA-ve?
Sipas detajeve që qarkullojnë në Kievin zyrtar, plani i Uashingtonit parashikon që rajonet e Krimesë, Luhanskut dhe Donetskut të njihen si de facto ruse nga SHBA. Parashikohen gjithashtu:
detyrimi që Ukraina të zhvillojë zgjedhje brenda 100 ditësh; reduktim i madh i ushtrisë ukrainase;
heqje dorë nga aspiratat për anëtarësim në NATO. Zëdhënësi i qeverisë gjermane, Stefan Cornelius, konfirmoi se Berlini është i përfshirë në diskutime me aleatët për të ndikuar në formësimin e planit, duke theksuar se “duhet të merren parasysh si sovraniteti i Ukrainës, ashtu edhe nevojat e sigurisë së Kievit”. Ai nuk komentoi mbi detajet e planit, duke thënë se procesi është ende në zhvillim.

Presioni amerikan: Marrëveshja deri më 27 nëntor
Reuters raportoi, duke cituar burime në Kiev, se administrata Trump po ushtron presion të fortë ndaj Zelensky-t që të nënshkruajë marrëveshjen e paqes deri të enjten e ardhshme, më 27 nëntor, në Ditën e Falënderimeve. Sipas raportimit, SHBA ka paralajmëruar se mund të ndërpresë ndarjen e inteligjencës dhe furnizimet me armë nëse Ukraina nuk pranon kornizën e propozuar.
Burimet shtojnë se presioni aktual ndaj Kievit është shumë më i fortë se në të kaluarën, ndërsa Washingtoni kërkon miratimin e shpejtë të planit të hartuar, sipas tyre, në konsultim edhe me Moskën.

Reagimi i Rusisë
Kremlini reagoi menjëherë duke deklaruar se nuk ka diskutuar asnjë plan për paqen me SHBA-në, duke hedhur poshtë pretendimet për bashkëpunim në hartimin e dokumentit.

Takim i ri në G20
Udhëheqësit evropianë pritet të takohen edhe në margjinat e samitit të G20 që zhvillohet të shtunën në Afrikën e Jugut, për të koordinuar hapat e mëtejshëm. Në takim do të marrë pjesë edhe presidenti finlandez Alexander Stubbs, i njohur për marrëdhënie të mira me administratën Trump.
Situata mbetet e tensionuar, ndërsa Kievi dhe aleatët e tij evropianë përballen me presion të shtuar diplomatik për të përcaktuar rrugën e paqes.

Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb