Zelensky: Parimet e planit të rishikuar të SHBA-së mund të çojnë në marrëveshje më të thella
Presidenti ukrainas Volodymyr Zelensky tha të martën se “parimet” e një plani të rishikuar të SHBA-së për t’i dhënë fund pushtimit rus të vendit të tij mund të çojnë në “marrëveshje më të thella”, duke theksuar se “shumë varet” nga Uashingtoni.
“Unë mbështetem në bashkëpunimin e vazhdueshëm aktiv me palën amerikane dhe me Presidentin Trump. Shumë varet nga Shtetet e Bashkuara, sepse është fuqia amerikane që Rusia e merr më seriozisht”, tha Zelensky në një mesazh video, duke vënë në dukje se është “veçanërisht cinike” që Moska vazhdon sulmet e saj ndaj vendit të tij ndërsa bisedimet e paqes janë duke u zhvilluar.
Plani fillestar i Uashingtonit për t’i dhënë fund luftës, tani në vitin e katërt, u rishikua pasi u kritikua si shumë i favorshëm për Moskën. Megjithatë, pikat e rishikuara nuk janë bërë ende publike.
Më herët sot, Presidenti ukrainas Volodymyr Zelensky i informoi aleatët e tij se ishte gati të diskutonte me homologun e tij amerikan Donald Trump “pikat e ndjeshme” të marrëveshjes së propozuar të paqes.
Duke iu drejtuar udhëheqësve të të ashtuquajturës Aleancë e të Vullnetshmëve, Zelensky u bëri thirrje evropianëve të bashkohen në negociata sepse “vendimet mbi çështjet e sigurisë që shqetësojnë Evropën duhet ta përfshijnë Evropën”.
Shefi i shtabit të Presidentit ukrainas Volodymyr Zelensky, Andriy Yermak, tha se kishte folur me Sekretarin e Ushtrisë të SHBA-së, Daniel Driscoll, përpara vizitës së tij në Kiev këtë javë.
“Faleminderit për objektivitetin dhe frymën tuaj konstruktive”, shkroi Yermak në një postim në platformën Telegram. “Siç njoftoi Presidenti Trump, ne presim që Sekretari (i SHBA-së) i Ushtrisë të vizitojë Kievin këtë javë dhe jemi të gatshëm të vazhdojmë të punojmë sa më shpejt të jetë e mundur për të finalizuar hapat e nevojshëm për t’i dhënë fund gjakderdhjes”.
Andriy Yermak tha se bisedimet e zhvilluara në Gjenevë kishin hedhur “një themel të fortë”, duke siguruar se Kievi mezi priste “bashkëpunim të mëtejshëm” me qëllim arritjen e një marrëveshjeje për t’i dhënë fund luftës.
“Ukraina nuk ka qëndruar kurrë dhe nuk do të qëndrojë kurrë si pengesë për paqen. Jemi mirënjohës ndaj SHBA-së për mbështetjen e tyre. Takimi i presidentëve do të përgatitet plotësisht dhe menjëherë nga ana jonë”, tha shefi i stafit të Zelensky-t.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë. Grupi Balkanweb
